AFL Game & Heireis

Tag 181-182: Hüt Morge häts gheisse: zämmepacke! Ganz nervös und chribbelig hämmer eusi siebe Sache i gsamthaft acht Gepäckstuck inegstopft. Mer händ nämlich erfahre, dass mer nöd nur eis Gepächstuck derf ufgäh bide Emirates, also händ mir bim shoppe nachli Gas gäh. ;-)

Am Namitag hämmer als Abschluss nomal en AFL, Australian Football League, Match gluegt. Zum nachli Ziit vertriibä bis euses Taxi zum Flughafe cho isch, hämmer inere Bar no paar Glesli Wii trunkä. ;-)

Ja, und dänn isches sowiit gsi, nach über 180 Täg, 53 rüttlige Busfahrte, 16 Flüg(bis etz), 15 Bootsfahrte, 8 Länder, 7 Tauchgäng, 2 Kontinente und unzählige schöne Moment, neigt sich eusi unvergesslichi Reis am End zue. Nur na zwei letschti langi Flüg bis mer all eusi gliebte chönd in Arm nä. Nur na en 11-stündigä Flug bis Dubai und en 6-stündigä bis Züri. Ih dene 6 Mönet händ mir so viel gseh und erlebt und eifach e hammer Zit gha, sodass mer jetzt echli mit gmischte Gfühl heigönd. Mir wärdet s’umereise und eifach chöne mache wasmer wett ohni en Plan z’ha, was dä nöchsti Tag mit sich bringt, sicher vermisse. Ah dere Stell wänd mir no allne Danke, wo eusi Reis so unvergässlich gmacht händ: allne Pilote für sicheri Flüg, dä Hostelahgstellte für hilfrichi Tipps und Tricks, dä Restaurantahgstelle, dass mer nie ä schlimmi Läbensmittel vergiftig gha händ, de Asiatische Busfahrer, dass eus trotz ihrem gföhrliche Fahrstil immer heil as Ziel bracht händ, allne Reisebekanntschafte, dass mer gegesitig eusi Abentür händ chöne erläbe und ustüschle, dä Jasy und em Joel, wo eus go bsueche cho sind und mer e super Zit in Indonesie gha händ, euse Familie, wo Dihei alles Administrative erledigt händ, allne Airbnb Hosts für ihri liebi Gastfründschaft, allne Diebe, wo eus verschohnt händ, sodass mer mit allem wieder heichömed, dä Tourguides, wo eus mit neuem Wüsse belehrt händ und eus unglaublich schöni Ort zeiget händ, eusem Lonely Planet Reisefüehrer, ohni dä mer zum Teil chli ufgmisse gsi wäret, allne Fründe, Bekannte und Verwandte, wo eus ih däne 6 Mönet nöd vergässe händ ;-), am Joel wo eus dä cooli Reiseblog ihgrichtet hät und en riese Dank ah euch, eusi liebe Läser, wo immer fliessig eusi Abentür mitverfolgt händ!!! Bis zum nöchste Mal. ;-D

Fremantle

Tag 180: Hüt isch genau es halbs Jahr ume. Läck, wie Ziit vergaht. ;-) Zum Glück ischs Wätter nöd mite Prognose mitgange und hät Räge abeglärt, sondern hät sies eignige Ding durezoge und für eus de ganz Tag s’Sünneli zeigt. Wies sött sie ahde letschtä Täg. ;)

Das händ mir natürlich usgnutzt und sind in südliche Teil vode Stadt greist. Mitm Zug simmer denn i 30 Minute in Fremantle ahcho. De Stadtteil isch eigentlich mal e eigeni Stadt gsi, will Perth aber so gwachse isch, ghörts mittlerwille zu Perth selber. D’Lüüt det sind trotzdem stolz uf ihri Hafestadt und uf ihri eigeti Football-Mannschaft. De Stadtteil isch nur so gspickt mit viktorianische historische Gebäude, so öppis gseht mer in Australie nur sälte. Det simmer denn au im Sunsneschii go z’Mörgele und nachher in berüehmte Fremantle Market, wo nur Fritig, Samstig, Sunntig offe hät. Det findet vo Souvenir, Essensspezialitäte bis Chleider alles, wo mer chan bruche. Mer sind nacher no churz s berüehmte Gfängnis vo Fremantle go aluege, wo zum Weltkulturerbe ghört. Mer chan leider nur mitere längere Füehrig is innere vom Gfägnis glange, was eus drum echli ahgschisse hät. :D Mer sind drum lieber nomal ines Kafi verusse es Wiswili go trinke und nochli go sünnele. Am spötere Namittag isches dänn zrugg is Zentrum gange.

Ah eusem letschte Abig hämmer nomal wele fein go ässe. Mer händ Glück gha, dassmer im usbuechte Jamie Oliver Restaurant no en Platz becho händ. S Resti isch super cool ihgrichtet und s Ässe isch sehr fein gsi. :-)

Perth City

Tag 178-179: Willmer hüt Morge na euses Mietauto gha hend, simmer zumene Lookout usserhalb vode Stadt gfahre. Zu dem glangt i nur 10 Minute und mer hät en super Usblick ufd Stadt Perth. De liit westlich vo Perth und zwar im Kings Park. Det chamer auno es idrücklichs Warmemorial bestuunä, wo jede Tag e Fackle brennt. Nachdem zrugg id Stadt zum eus chli mit Chleider go zuedeckä. ;-)

D’Lory isch denn spöter no zum Coiffeur. Nacheme knapp 3-stündigä Termin simmer denn euse z’Nacht go ichaufe und hends eus ide Wohnig kuschelig gmacht. ;-)

Am nöchste Tag simmer namal chli die schöne Stadt Perth go ahluege und namal bitzli go shoppe. Will mer aber scho viel gseh händ im innere vode Stadt, simmer chli usserhalb ines Ichauszentrum. Das isch im Suburb Joondaloop gsi, wo mer innerhalb vonere Halbstund erreicht. Am Abig hämmer den wellä is Kino und hend au scho en Platz reserviert. Wo mer aber im Kino ahcho sind, hets gheisse das de Film da um diä Ziit nöd lauft. Mer händ dänn usegfunde, dass mir usversehe in Melbourne amene Kino ahglüte hend, wo glich gheisse hät. :-D Mer sind denn aber als Notfallplan ines Resti und hend e superfeini Antipasti Platte und e Fläsche Rotwii bstellt. ;-)

Kalbarri Nationalpark – Perth

Tag 177: Nacheme feinä z’Morge simmer am 9ni zum Igang vom Kalbarri Nationalpark gfahre. Au da choschtet es Tagesbillet für es Auto wieder 12$. Idem findet mer über 2000 km2 Buschland, atemberaubendi Schluchtä und sehr cool gformti Küschteklippe. Am Meer entlang häts etlichi Lookouts und zwei längeri Wanderweg, so viel Ziit händ mir aber leider nöd gha. Mir sind nämlich direkt zude Hauptattraktionä bide Canyons gfahre. Det glangt mer über sandigi Weg nach es paar Kilometer zum Loop Trail. De duuret zwar 8 Kilometer, d’Hauptattraktion chunt aber scho nach eim und zwar s’Nature’s Window. Das isch zum Glück i eusem Ziitplan dringläge. Ganz ide nöchi isch auno de West Loop Lookout, wo mer alles vo wiitem chan betrachte. Nach es paar wiitere Kilometer Autofahrt sind mer zum Z-Bend Lookout cho. Det chamer nach eme 1,2 Km lange Weg de Fluss beobachte, wiener wie es Z durd Felswänd dureschlinglet. De letscht churz Stopp zmitzt im Nationalpark hämmer bim Ross Graham Lookout ihgleit. Bis det hämmer namal knapp 50 Km müsse fahre. De isch aber weniger spektakulär gsi. S’Wätter hät hüt sogar für es paar churzi Walks mitgspielt. Es isch nämlich immer wieder blaue Himmel und bi 25 Grad scho e Affehitz gsi. ;-)

De cooli Nationalpark hämmer leider scho bis zum Mittag müsse abklapperet ha, wills bis zrugg uf Perth über 6h Wäg isch. De hämmer denn also in Ahgriff gno und so simmer super zum z’Nacht in Perth ahcho.

Perth – Pinnacles Desert – Kalbarri Nationalpark

Tag 176: Euses Auto hämmer nur für drü Täg gmietet, mer händ also möglichst früeh hüt Morge los müsse. Am 8i simmer denn scho ufem Highway richtig Norde ah z’treffe gsi. Euse erst Halt hämmer nach 1.5h erreicht. Und zwar isch das in Lancelin gsi, leider häts aber recht gregnet. Mer sind d’Attraktion i dem Ort trotzdem schnell go bestuunä. Es hät det nämlich mächtigi wiisi Sanddünä, wo mer bi guetem Wätter au chan druf surfe. Für Wind- und Kitesurfer isch das übrigens au es Paradies, will da de Wind immer bsunders Starch isch.

Uf de Wiiterreis hämmer denn öppis sehr speziells gseh. En See grad vor de Küschte. Er isch Chaugummi-Pink gsi. Nöd übertriebe! ;-) Sehr en spezielle Ahblick gsi, luegeds eu selber ah. :-D

De nöchsti Stopp hämmer bim Nambung Nationalpark ihgleit, wo pro Auto 12$ Itritt zahlsch. De Räge hät det zum Glück gad e Pause ihgleit. De Nambung Nationalpark isch d’Heimat vom spektakuläre Pinnacles Desert, wo tuusigi vo Chalchsteisülä schinbar unwürklich usem Wüeschtebode ufraged und de chalchrichi Sand de Überrescht vo zemmedrucktä und im Lauf vode Jahrtuusig erodierte Muschelschale darstellt. Dur die Felsformationä chamer mitm Auto e 4 Km langi Rundtour mache, wos immer wieder cooli Ussichtspünkt hät.

Nach namal vier Stundä fahrt simmer churz nachem 4i in Kalbarri ahcho, wo mer hüt übernachtet. Leider hät d’Reception scho zuegha. Wo mer scho Angst becho und denkt hend, dass das doch nöd chan sii, hämmer e Nummere gseh, wo mer händ chöne ahlüte und mitm entsprechende Code en Tresor gad bide Reception öffne und de Schlüssel usehole.

Darwin – Perth

Tag 175: Hüt Morge hämmer scho wieder früeh use müsse, euse Shuttlebus hät eus nämlich scho am 8i abgholt. Ufem Bus simmer gad na uf mehreri vo eusere Tour gstosse. Euse Flug isch churz vorem 10 gstartet und mit den Ziitverschiebig simmer sogar scho am Mittag in Perth ahcho. Det hämmer eus en chline Flitzer gmietet. Mit eusem Hyundai i20 simmer id Stadt gflitzt, wo mir sehr guet gläge es Appartement gfundä hend. Vomne junge Bsitzer simmer herzlich empfange worde und hend au gad na sin Parkplatz chöne benutze.

De Nahmittag hämmer grad usgnutzt zum Innestadt vo Perth go besichtigä. Knapp füüf Minute z’Fuess und mer sind scho im Herz vode Ichaufsstrasse gsi, wo sich Strassekünstler, Kaffis und Läde anenand reihed. D Stadt am indische Ozean isch sehr modern und ufstrebend. So herrscht au immer e cooli und entspannti Atmosphäre, obwohl vom grosse Gschäftsviertel die australisch Wirtschaft ordentlich ahkurblet wird. Mir hend eus also zimli schnell wohl gfühlt und sind nacheme feinä z’Mittag chli go shoppe. ;-)

Uluru Tour Day 3

Tag 174: Mer sind wieder am 05:00 gweckt worde, da mer de Sunneufgang zwüsched em Uluru und de Kata Tjuta nöd händ wellä verpasse. Leider hätmer vode Sunne nüt gseh, wills immerno schlächts Wätter gsi isch. D’Kata Tjuta sind die zweit Attraktion im Nationalpark und wie de Uluru riesigi Felsformatione ihde Wüestelandschaft. Sie sind au bekannt underem Name Olgas. Wie bim Uluru (Ayers Rock) hät da en wiese wellä entscheidä wie diä Felsä heissed. Es git Bsuecher, wo vode Kata Tjuta no meh beiidruckt sind, wie vom Uluru, da s’gsamthaft grösseri Felsä (200m höcher) sind, wo mer sogar chan zwüscheddure wandere, was sehr imposant isch. Es sind nämlich 36 Felsä, wo dicht anenand lieged und tüüfi Täler und Schluchte bildet. Det hämmer denn au en zwei stundigä Walk über Stock und Stei gmacht. Kata Tjuta isch wie de Uluru für d’Aborigines vo grosser Bedütig. Es git bi beidne Felsformationä au immer Abschnitt, wo mer nöd derf fotografie und mer sött immer uf de Wäg bliebe.

Nachdem hät sich eusi Tour au scho am End zuegneit. Mer sind zrugg zum Campingplatz go Zelt abruumä und Sandwitch für d’Fahrt go mache. Nach knappe sechs Stundä Fahrt simmer zrugg in Alice Springs gsi. Nachhere churze Duschi hämmer all Andere vode Tour inere Bar troffe, will mers scho wieder vermisst händ. ;-) Nacheme feinä Burger, paar Bier und guete Livemusik simmer todmüed is Bett gheit!

Uluru Tour Day 2

Tag 173: Bereits am 05:00 simmer gweckt worde. D Nacht ufem Bode isch zimli unbequem gsi und mer händ jede Chnoche gspürt. :D Euse Guide hät eus no verzellt, daser ihde Nacht ufgwachet seg, wills näbed sim Chopf graschlet hät. En Dingo isch direkt nebed ihm gsi! Das sind die wilde Hünd wo rächt agressiv sind. Er hät aber Glück gha und hät en chöne verschüche. Phuuu, zum Glück hämmer eus für d Chuchi entschiede! ;-)

Nach em Zmorge hämmer eus uf die 3h Fahrt zum Uluru-Kata Tjuta Nationalpark gmacht. Det simmer vorem z’Mittag no is Touristeinfozentrum, wo mer vo Malerei und Holzschnitzereie vo de Aborigines, Informatione über de Nationalpark bis zu churze Film über d’Anangu gseh händ. D’Anangu sind d’Aborigines, wo scho über tuusigi Jahr det läbed und de Park ah Parks Australia verpachtet und mite ihne verwaltet.

Nachdem mer bi eusem Campingplatz ihtroffe sind, hämmer e anderi Tour troffe, wo zum Glück na Zält debi gha händ. De Befehl isch vo Ihrem Tourguide cho: “Alles stah lah für die ander Gruppe!”, Juuuhuu! Susch hettemer nämlich wieder s’gliche Problem gha wie gester. ;-) Churz drufabe simmer zu eusem hütigä Ziel gfahre, em Uluru. De riese Felse wird vode wiese Ayers Rock gnännt und das nur will de erst wiis, wo de Felse gseh hät, das so hät wellä. Sit d’Aborigines aber meh ahnerchännt wärded, wird de Name Uluru ziemlich überall verwänded. In Australie isch de riesig rot Felse, wo höcher als de Eifelturm isch, es absoluts muss und zehlt zum Weltnaturerbe. Es pilgeret im Jahr bis zunere halbe Million Mensche da ahne. Interessant debi sind vorallem zwei Sache, zum eine de 10,6 Kilometer langi Walk rund um de Uluru wommer gmacht händ und de Sunneuntergang, wo mer vo chli wiiter weg ahluegt und de Felse so richt füürrot schimmere laht. Det häts denn auno en Champagner gäh, dass mit eusere coolä Gruppä händ chöne ahstossä. Spöter simmer zrugg zum Campingplatz und hend es fein BBQ mit under anderem Kangaroo und Härdöpfel im Füür gässe.

Uluru Tour Day 1

Tag 172: Hüt ischs endlich los uf eusi 3-tägig Outbacktour gange. Bereits am 05:25 hämmer eus alli bimne Hotel im Stadtzentrum müse träffe! Insgesamt simmer 20 Persone gsi, fasch alles jungi. :-) S hät sehr viel Dütschi gha, es Schwizerpärli, zwei Engländer und no eini us Australie. Mer händ eus uf Ahhieb super guet verstande. :-) Als ersts ischs zum Kings Canyon gange. D Fahrt hät insgesamt ca. 5h duret. Das isch grad guet gsi, sodass mer nochli Schlaf händ chöne nahhole. ;-) Dä Kings Canyon isch eini vode spektakulärste Attraktione im Outback. Wommer acho sind, häts leider rächt fescht grägnet. Gemäss eusem Reiseleiter rägnets NIE im Outback. Und mir händ s “Glück” gha, dassmer das Wätter grad für die volle 3 Täg verwütscht händ! Janu, trotz em Räge simmer dänn ufde Kings Canyon Rim Walk. Dä duret insgesamt ca. 3h und mer wird mit mehrerä hammer Ussichte belohnt! Nach emne churze aber steile Ufstieg, folgt dä Pfad am obere Schluchterand und füehrt dänn über Stufe zum “Garden of Eden”. S idylische Wasserbecki wird vo üppige Palme umgäh. Dä nöchsti Wägabschnitt windet sich zwüschet enere Gruppe vo riesige, verwitterete Sandsteiformatione dure.

Nach dä Wanderig simmer ih euses Camp gfahre wommer d Nacht verbracht händ. Mit heissem Tee hämmer eus zersch müse ufwärme und dänn uf d Suechi nach trochenem Holz fürs Lagerfür gah. Das isch dänn echli schwirig worde, will vom Räge alles durchnässt gsi isch. Irgendwie hämmers dänn doch gschafft es Füür z mache wo für 2-3h ghebet hät, will de Sevi zwei, drüü Bäum usgrissä hät ;-) So hämmer während em Znacht wenigstens echli wärmer gha. ;-) Euse Guide hät eus dänn verzellt, dasmer kei Zält ha werdet die Nacht und so richtig australisch imne “Swag” underem Sternehimmel schlafe dünd. Vom Sternehimmel hätmer leider nöd würklich öppis gseh. ;-) En Swag isch so öppis wie e grossi Hüllle mitere Matte drin, wo mer mitem Schlafsack dri gaht. Dä chammer sogar ganz überem Chopf zuemache, damit mer nöd Nass wird. Für söttig mit Platzangst aber nöd so empfehlenswärt. ;-) Eusi Freud hät sich dänn auchli in Gränze ghalte, wills immerno grägnet hät. Zum Glück häts no s Chuchizält gäh wo mir eus mitde zwei andere Schwizer breit gmacht händ. :D So simmer nöd nass worde und händ kei Angst vo unahgmeldetem tierischem Nachtbsuech müse ha. ;-) Dä rest vo eusere Gruppe hät sich dänn relativ schnäll au en Schärme gsuecht, wills wieder fester ahfange hät rägne. Sie händ dänn bide Nachbere underem Dach zueschlupf gfunde. :D

Darwin – Alice Springs

168-171: Ihde nöchste 4 Täg isch nöd bsunders viel passiert. Am erste Tag simmer gege die 11 id Stadt go zmörgele, wommer dänn per Zuefall no es paar vo de Gruppe troffe händ. :-)
Am 12i simmer mitem Taxi an Flughafe bracht worde. Es isch los nach Alice Springs gange. Dä Usgangspunkt für eusi 3-Tägig Tour im Outback. Zersch hämmer aber no 3 Täg zum relaxe gha.

Alice Springs isch prägt dur ihri schroffi Landschaft, s Umland us rote Wüesti und de Aborigines-Kultur. D Stadt sälber hät nöd so viel z büte. Mer hät schnäll s wichtigste gseh. I dene 3 Täg hämmer chli euse Blog ufgschaffet, chli d Stadt erkundet, alli Wösch gwäsche, gläse, fein kochet und endlich mal wieder usgschlafe. :D